នាយករដ្ឋមន្ត្រីស្នើព្រះហាក្សត្រតែងតាំងលោកឡុង ឌីម៉ង់ ជាឯកអគ្គរាជទូតថ្មីប្រចាំប្រទេសកូខាងត្បូង
09-April-2016 | ដោយ មែន កំសត់
ភ្នំពេញ ៖ ប្រមុខរាជរដ្ឋាភិបាលកម្ពុជាបានស្នើព្រះមហាក្សត្រ ដើម្បីតែងតាំងអ្នកនាំពាក្យសាលារាជធានីភ្នំពេញ លោក ឡុង ឌីម៉ង់ជាឯកអគ្គរាជទូតវិសាមញ្ញ និងពេញសមត្ថភាពរបស់កម្ពុជា ប្រចាំសាធារណរដ្ឋកូរ៉េ ជំនួសលោក ស៊ុត ឌីណា។
លិខិតរបស់ សម្ដេចនាយករដ្ឋមន្ត្រី ហ៊ុន សែន ថ្វាយព្រះមហាក្សត្រ ចុះថ្ងៃទី៨ មេសា បញ្ជាក់ថា ការស្នើតែងតាំងនេះដោយយោងតាមតម្រូវការងារចាំបាច់របស់រដ្ឋាភិបាល ហើយក៏ស្នើបញ្ចប់តួនាទីលោក ស៊ុត ឌីណា ពីតួនាទីជាឯកអគ្គរាជទូតវិសាមញ្ញ និងពេញសមត្ថភាពរបស់កម្ពុជាប្រចាំសាធារណរដ្ឋកូរ៉េផងដែរ។
កាលពីល្ងាចថ្ងៃទី៨ ខែមេសា ឆ្នាំ២០១៦ អ្នកនាំពាក្យក្រសួងការបរទេស លោក ជុំ សន្ទរី បានបញ្ជាក់ថាក្រសួងការបរទេសបានបញ្ជូនមន្ត្រីមួយរូបរបស់ខ្លួនគឺ លោក ហុង បញ្ញារិទ្ធ ដែលត្រូវជាកូនប្រសារលោកសុខ អាន រដ្ឋមន្ត្រីទទួលបន្ទុកទីស្ដីការគណៈរដ្ឋមន្ត្រីឲ្យទៅកាន់ការងារនៅប្រ ទេសកូរ៉េខាងត្បូងបណ្ដោះអាសន្ន ជំនួសអតីតឯកអគ្គរាជទូតលោក ស៊ុត ឌីណា។ ទោះយ៉ាងណា លោក ជុំ សុន្ទរីបញ្ជាក់ថាក្រសួងមិនទាន់តែងតាំងមុខងារផ្លូវការណាមួយដល់ លោក ហុង បញ្ញារិទ្ធ នៅឡើយទេ។
លោកមានប្រសាសន៍ថា “មិនទាន់មានការតែងតាំងមុខងារអីជាផ្លូវការទេបាទ! គ្រាន់តែជាការបញ្ជូនព្រោះសភាពការណ៍យើងបន្ទាន់ភ្លាមគឺយើងបាន បញ្ជូន …ហើយបច្ចុប្បន្នហ្នឹងគឺថ្នាក់ដឹកនាំយើងកំពុងតែពិនិត្យពិចារណា អំពីការតែងតាំងឥស្សរជនទៅធ្វើជាឯកអគ្គរាជទូតកម្ពុជាប្រចាំនៅ កូរ៉េខាងត្បូងហ្នឹង”។
ដោយឡែក លោក ឡុង ឌីម៉ង់បានប្រាប់អ្នកសារព័ត៌មានថា លោកមិនទាន់ឃើញលិខិតរបស់ សម្ដេចនាយករដ្ឋមន្ត្រី ហ៊ុន សែន ដែលស្នើទៅព្រះមហាក្សត្ស ដើម្បីតែងតាំងលោកជាអគ្គរាជទូតប្រចាំប្រទេសកូរ៉េខាងត្បូងនៅឡើយទេ មកទល់នឹងយប់ថ្ងៃទី០៨ ខែមេសា។ ប៉ុន្តែទោះយ៉ាងណាក្តី លោកឡុងឌីម៉ង់ សម្ដែងក្ដីរីករាយ និងយល់ថា នេះជាមហាកិត្តិយសរបស់ លោក ដែលលោកមានឱកាសទៅបំពេញការងារនេះ។ ទន្ទឹមគ្នានេះដែរលោកក៏បង្ហាញក្ដីបារម្ភដែរ ចំពោះការងារថ្មីនេះ។
គួរបញ្ជាក់ថា លោក ឡុង ឌីម៉ង់ ជាកូនប្រុសរបស់លោក ឡុង វិសាលោ ដែលជារដ្ឋលេខាធិការក្រសួងការបរទេស។ លោកជាកូនប្រសាររបស់លោក ញឹម វណ្ណដា អនុប្រធានគណៈកម្មាធិការជាតិគ្រប់គ្រងគ្រោះមហន្តរាយ។ លោកបានបញ្ចប់ថ្នាក់អនុបណ្ឌិតផ្នែកទំនាក់ទំនងអន្តរជាតិ៕
ចំនួនអ្នកទស្សនា
- ថ្ងៃនេះ2431
- ម្សិលមិញ5781
- សប្តាហ៍នេះ8221
- ខែនេះ202821
- ឆ្នាំនេះ202821
- សរុប20645277